Kua mate a Takuta Te Kapunga Matemoana Dewes e mohio whanuitia ana ko 'Koro'. No nga kawai rangatira o Ngati Porou a Koro aa no Te Whanau a Rakairoa, Te Whanau a Hunaara, Te Whanau a Hinerupe, Te Whanau a Te Aopare, me Tuwhakairiora. Waru tekau tona pakeke ka mate i te ata nei ki te kainga o tona tuahine a Mereheni Waitoa i Te Araroa.

 

Kua haere ia ki ona matua tipuna, ki tona hoa rangatira kia Parekura Katarina Thelma Dewes (nee Raureti) no Ngati Rangitihi, Ngati Whakaue me Ngati Pikiao, ki ona matua kia Te Aopare raua ko Henry John Dewes, ki ona tuakana taina kia John Henry, kia Samuel Hawkins, kia Arnold William, kia Whaimutu, kia Nepia ratou ko Lena Elizabeth.

 

Kua mahue pani mai ko ana tamariki a Cathy, a Whaimutu, me Campbell, a ratou hoa, me a ratou tamariki mokopuna, me ona tuahine a Mereheni Waitoa raua ko Heni Torori Dewes-Porter.

 

Kei te haria tona tupapaku ki Turanga ki Evans Funeral Services aa ka whakahokia ki Te Araroa hei te po nei, ki te kainga o Mereheni takoto ai mo te po. Hei te ata apopo ka hikina ki te marae o Hinerupe i Te Araroa takoto ai. Hei te ata o te Paraire, tekau ma tahi karaka, ka whakahaeretia te karakia whakamutunga mona. Ka nehu a Koro ki te rua koiwi o ona matua tipuna, ara ki Tangata Hapuku, i Horoera. No reira e te papa, e te kaka wahanui, e te puna o te matauranga Ngati Porou, haere. Okioki ki roto i nga ringa o to Kaihanga.